هو الدين بيقول ايه .. أسطورة الدين والحكم على الناس

هو الدين بيقول ايه .. أسطورة الدين والحكم على الناس

21.2.15

من قريب اكتشفت من مواقف كتيــــــر  إن جملة الدين مالوش دعوة بالحكم على البنى آدمين ده أسطورة فاشلة, ولقيت إن الدين له الجانب الأكبر -إذا كانت التربية على أساس سليم- فى تكوين شخصية البنى آدمين.. 

وإن الحكم دايما اللى نقصده, بيكون على الفطرة اللى عليها البنى آدم, كل ما يكون أحسن كل ما تفهم إن الفطرة ده قل تشويهها بعوامل الحياة .. والجدير بالذكر إن الإسلام أصلاً هو دين الفطرة.

يعنى أصحابى اللى عرفتهم هنا, دافع الدين عندهم بيخليهم يعملوا حاجات كتير عشان ربنا يتقبل منهم وبرضه ما يعملوش حاجات كتير عشان بيتقوا ربنا. 

الناس دول سهل تقنعهم يعملوا أعمال خير كتيرة من غير ما تتعب فى تصوير صورة مادية لهم أو منفعة مباشرة -حتى مجرد الاحساس براحة الضمير مثلاً- وأعمال الخير ده ما أقصدش بها الصدقات كشكل وحيد, إنما أقصد المعاملة الطيبة, وحسن النية, ومساعدة الناس, ....

أي نعم بلدنا مليانة بالأشكال الكتيرة للمسلمين اسماً أو المتشددين باسم الدين, والاتنين يا واحد مايعرفش حاجة عن الدين غير اسمه وآخره التعصب له زى تعصبه لفريق كورة, والتانى مايعرفش عن الدين إلا اللى يناسب هواه ومصالحه, أو حافظ مش فاهم

لكن شهادة لله, كتييييير جدا من اللى عرفتهم هنا فى مصر مع كل اللى بيحصل, هم أفضل ألف مرة من كتيييير جداً عرفتهم براها !!