أبو حميد

أبو حميد

29.3.15

أبوحميد .. آسف جدا على الإزعاج, عارف إن الصوت عالى والدوشة تخض, مع إنى ما كانش نفسى ده تكون أول حاجة تسمعها لما تيجى .. مش مهم بكرة هتقدر وتعرف إن الدوشة ده فرحتنا بوصولك, شوف كل الناس جاية بيتخانقوا مين ياخدك بالحضن ويبوسك الأول, إنت واحشنى قوى, بقالى شهور مستنيك ..

أنا كنت هاطير من الفرحة لما جالى خبر وصولك بالسلامة, مش انت فرحان برضه ؟ وللا متضايق  ؟ ولا مخضوض ؟؟
أنا مش عايزك تخاف من حاجة, أنت هنا فى أمان برضه, عارف إنك بقى لك فترة محبوس وكنت لوحدك, بس صدقنى كنت  بادعى لك تخرج بالسلامة وكنت بأعد الأيام عشان أشوفك .. خلاص من هنا ورايح مش هتكون لوحدك تانى, انت وسطنا.

نسيت أعرفك بنفسى؛ أنا اسمى سالم, بس مش عايزك تنادينى بالاسم ده, أنا اسمى بابا, أول حاجة هعلمها لك, سيبك من ماما دلوقتى :)
وأنا يا سيدى اللى شايف فيك كل حاجة حلوة كان نفسى تكون فيا, وهاعمل كل اللى أقدر عليه عشان تكون أحسن منى. أنت مش مجرد ابنى وبس, أنت الحاجة اللى خللتنى ألحق نفسى من الإحباط اللى كنت فيه..
فبل ما تيجى كنت كاره الدنيا وكاره نفسى, مفيش أمل ألاقى شغل مع إنهم قالوا لى ذاكر كويس عشان تجيب مجموع كويس وتخش الكلية اللى بتحبها وترتاح واتخرجت زى ما دخلت ! وفضلت مستنى .. هو أنا باحكى لك الكلام ده ليه ؟!! ده أول يوم لك ومش عايز أقرفك, لينا  قعدات نرغى فيها, المهم دلوقتى انك تعرف إن إنت اللى علمتنى, مهما عدى عليَ فى ححياتى مايأسش وأصبر وأتوكل على الله وهو هيرزقنى, انت اللى هتخلى لى هدف أشقى عشانه وأنا راضى وفرحان, عشان تكون أحسن, أوعدك هاعمل كل اللى أقدر عليه عشان تكون أنت أحسن, وأكمل فيك اللى كان ناقصنى ..

أنت نمت ؟؟ نكمل كلامنا بعدين ..

الحاج كما ستنادينى قريباً :)