عصر الديناصورات .. 2- التحمرش وعمل المرأة

3.1.15



من العجائب إنك لما تسأل حد فينا عن الإسلام هتلاقينا بنتكلم بحماس وتاخدنا الجلالة فى الدفاع عن الإسلام تلقائياً لأننا متوقعين الصورة السلبية المتصدرة للعالم -واللى لسه ما أخدناش بالنا إننا مشاركين فيه تشكيل الصورة ده بشكل كبير - لكن ما علينا, هتلاقينا بنتكلم عن الإسلام على إنه المخلص للعالم من كل مشاكله اللى عمال يلف يدور لها على حل وما وصلش..

بس لما تيجى لوقت الجد فى واقعنا الجميل, هتلاقى إن فيه حالات عندنا على وشك الإنفجار عمرنا ما بنتكلم فيها وبناخدها من برا برا, زى حرية المرأة فى مجتمعنا
قبل ما أقول ((رأيي)) فى الموضوع ده فيه نقطة مهمة دايما بتشبك السلوك فى بعض وتلعبك الدنيا.. 

أولاً: 
- هو احنا مسلمين ؟

- آه
- طب هو احنا بنطبق فعلاً الإسلام ؟ 
- إيـــه  ؟!!

هو احنا لو كنا بنطبقه فعلاً ونشيله, لحد ما بننساه,

ثانياً:
هو احنا لما بنقول إننا من أكتر الشعوب المتحرشة بالمرأة, ده معناه إن كلنا كده زى الزفت ؟ 
هيكون فيه ولو حتى  اتنين على الحدود يعرفوا ربنا ومش بس ما بيتحرشوش, لكنهم كمان ممكن يضحوا بحياتهم عشان يحموا بنت, وفى رأيي ان الناس الكويسة مش قليلة فحرام إننا لما نيجى نحكم نعمم ونهدر حق ناس محترمة اللى فى رايى الحفاظ عليهم أهم حاجة ممكن نعملها.


نرجع لموضوع التحرش:

أولا: هو نتيجة طبيعية لجهل وفقر ناس كتير جداً وعدم قدرتهم على الجواز فى ظل وجود السبب التانى

ثانياً: بس الإعلام الزبالة والأفلام التافهة اللى طول عمرنا بنتفرج عليها وعمرنا ما حسينا إنها بتهد فينا أكتر ما بتبنى ألف مرة .. وأفلام السبكى ومقررات المدارس أكبر دليل !

ثالثاً:  
بسبب بعد الناس عامة كراجل أو ست عن الدين
يعنى الراجل المطلوب منه يغض بصره فى كل الأحوال ده غير إنه مايتحرشش أصلأ!!  والست المفروض يكون لبسها محتشم فى كل الأحوال 
يعنى الراجل مايغضش بصره عن المحجبة لأنه كده كده مش هيشوف حاجة, وييجى على التانية ويملى عنيه
والست ما تتلكش وتقول انها كده كده بيتحرشوا بها وان الموضوع مالوش علاقة باللبس
‏‏قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا}‏‏ الآية ‏[‏النور‏:‏ 30-31‏]

الخلاصة يعنى, إن مواضيع زى ده بيخش فيها الحابل بالنابل - معرفش يعنى ايه :) -
وكل واحد واخد نقطة وافتكر نفسه جاب التايهة -زيى كده- ونازل فى الناس ضرب, ولما ييجى حد يقول كلمة حق يا هيتقال له إنه ذكورى متعصب ضد حرية المرأة اللى هى أمك وأختك يا كلب -مع صوت قلم على قفاك-
وما نكرش إن فيه ناس كتير محسوبين علينا مسلمين وبيقولوا كلام مستفز, بس ما تظيتش وتعمم ع الناس كلها !


وبالنسبة لعمل المرأة ,, والمرأة نصف المجتمع ,, والتيتا فى النانا, والنانا فى التيتا
ولو حبيت تتجرأ وتناقش الموضوع ده هتلاقى الباصص لك من بعيد وايده على سلاحه لاحسن تفكر تقول كلمة كده وللا كده ..

وبافتكر هنا مشهد سعيد صالح -الله يرحمه- لما كان بيقول كان كلهم لازم يفتحوا مع أخته سحر عشان مايصحش تروح الكباريه لوحدها ! فالأب لازم يشتغل ويشوف مستقبله, وبرضه الست لازم تخرج وتشوف مستقبلها والعيال كبرت وتقدر تولع فى البيت من غير مساعدة ..
أيواً زى ما حضرتك بكسر التاء أو فتحها قريتوا, رأيي إن عمل المرأة مش شىء أساسى بالمرة, وإن الأفضل إنها تهتم بالبيت ..

ورداً على هو احنا شغالين عندكو اللى بتقولها الستات وننضف ونطبخ لكو وانتوا قاعدين بشوات : طيب هو الراجل لما بيخرج على رزقه ورزق مراته وعياله ده بيبقى شغالى عند أمى ؟! ولما بيطلع يجاهد فى سبيل الله يدافع عن نفسه وعيلته وبلده , ده طالع سفارى ؟!! واللى بيحفى ويطلع عين أمه عشان يعمل بيت بالحلال وبيدفع دم قلبه ويتداين ما بنجيبش سيرته ليه ؟! -مع اعتراضى أصلاً على تحويل المجتمع للجواز للصورة ده -

- ما هو احنا مجتمع كدا يربى البنت انها تطبخ وتنضف والولد يتفرج ع الماتش جانب باباه .. - مش معنى إن كان فيه مشكلة فى بيتكوا إنكوا تعمموها على خلق الله كلهم
ومش المفروض إننا لما نحل مشكلة ناخد السكة الشمال فى الحل, يعنى يا الست خدامة والراجل قاعد فى البيت, يا الراجل والست سايبين البيت 
اهتمام الست بالبيت مش معناه إهانة لها ومش معناه إنها تقعد زى قلتها وماتتعلمش .. بالعكس أبسولوتلى, الحياة كلها من غير الست مستحيلة, ومشاركتها لها دور مهم, لكن مش المفروض إنه يطغى على الجانب الأساسى من الحياة اللى هو البيت, والتربية
والكلام ده مش معناه إن الراجل باشا ويقعد فى البيت زيه زي العفش ومحسوب علينا راجل, الرسول عليه الصلاة والسلام كان بيخيط ثوبه ويخصف نعله, وكان يقول صلى الله عليه وسلم " خيركم خيركم لأهله, وأنأ خيركم لأهلى " وكان يقول "رفقاً بالقوارير" 

- طب انت تعرف ان مش عارف كام% من الأسر المصرية بتعولها ستات بس ؟
- ربنا يعينهم ويخفف عنهم
- !!!
- ده الأصل ؟
- لأ ..
- شكراً

رأيي إن الأم هى الركن الأساسى فى البيت بمشاركة الأب, ودور المرأة فى المجتمع مهم جداً وحيوى طالما مش هيأثر على بيتها ولا جوزها, والراجل مش المفروض يعيش الدور وينفض لبيته ومراته ويتقمص دور سى السيد !

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger