3D Printing - الطباعة ثلاثية الأبعاد

7.4.15


كانو بيعلمونا في هندسة الإنتاج اننا لو عايزين نعمل شكل ثلاثى الأبعاد بنعمله بطريقة السباكة, يعنى بنجيب قالبين رمل بيكملوا بعض, وبنحفر في كل واحد فيهم نص الشكل اللى عايزين نسبكه, وبعد كده بنقفلهم على بعض, وبنصب من خلال فتحة صغيرة المادة اللى عايز نصنعه بها زى الحديد مثلا وتسيبه مده لحد ما يبرد ويمسك نفسه.. لو مافهمتش حاجة من الكلام ده, عادى, انا كمان كنت هشيل المادة ده لولا ستر ربنا J


الموضوع معقد, وبياخد وقت ومجهود, وفيه أشكال معقدة الإنسان مش بيقدر يصنعها بدقة الرسومات اللى بيعملها بالكمبيوتر مثلا في برنامج زى 3D Max. بس فى  أواخر التسعينات بدأت تظهر الـ 3D Printers -ولو ان كلمة طباعة ده مش كلمة دقيقة قوى. والفكرة  كلها ان الرسمة تكون بتعريف (.stl)  وبعد كده تطبعها. والطابعة ده لها أكتر من طريقة منها انها تكون بتستخدم مادة زى الشمع وهى سايحة, بتنزل بدراع بيتحرك كأنه بيرسمها وبتتماسك بسرعة أول ما بتنزل وبتبنى الشكل من تحت لفوق طبقة طبقة, أو ممكن يكون فى الطابعة مكعب عبارة عن شرايح بلاستيكية كتير فوق بعض, واللى بتعمله انها بتقطع الشرايح واحدة واحدة, لحد ما توصل للشكل المطلوب. ولكن فيها عيب إنها بتاخد وقت كبير من ساعات وممكن أيام على حسب تفاصيل الشكل وحجمه.

الطباعة ده كانت بتستخدم بشكل أساسى في الصناعة أو الشركات اللى بتحتاج تعمل Prototype أو نسخة تجريبية من المنتج اللى عايزين يوصلوا له, وفى صناعة الأطراف الصناعية, وغيرها. لكن الجديد ان الـ 3D Printers بدأت تنتشر وسعرها بدأ يقل كتيير عن الأول (نزلت من عشرات الآلاف إلى حدود الألف دولار) وده فتح المجال لسوق جديد بيسهل على المستهلك انه يصنع الشكل اللى هو عايزه مش مستنى الشركات تنزل له منتجات يختار منها.

للتوضيح: مثلا انت عايز تجيب cover للتليفون بتاعك, بتنزل السوق تتفرج, السوق بيكون فيه أشكال محدودة (مهما كترت) ومتكرة طبقا للبلد اللى انت فيها وطبقا لذوق التاجر اللى بتشترى منه, والمصانع أصلا عشان تطلع منتج رخيص لازم تنتج كميات كبيرة من كل شكل, وده بيأثر على تنوع الأشكال. فبدل االدوخة ده كلها قريب إن شاء الله هتقدر تدخل على النت تدور على التصميم اللى انت عاوزه وتشتريه –طبعا هيكون أرخص كتير-  أو ممكن كمان تصمم انت الشكل اللى انت عايزه على ذوقك, وتعمله في الـ 3D printer اللى في البيت عندك, ومابقتش محتاج لمحل يختارلك الأشكال اللى انت هتشترى منها.

والكلام ده هيتطبق على حاجات كتييير جدا هتسهل عليك وهتوفر لك كتير, مثلا لو قطعة غيار باظت تقدر تعملها بنفسك ومش هتكلفك الأرقام الخرافية اللى الشركات بتبيعها بيها. الأطفال ممكن يرسموا شكل الألعاب اللى عاوزينها, والمدرسين لو محتاجين يعملوا ألعاب معينة للتوضيح للتلاميذ,...

ومتوقع في المستقبل إن الأطباء باستخدام تكنولوجيا شبيهة يصنعوا أعضاء من الجسم باستخدام نسيج من جسم الإنسان بحيث تكون مطابقة له من غير الحاجة لمتبرع. وفى اليابان بيصوروا الطفل في الرحم, وبيعملوا الشكل عشان الأب والأم يشوفوه. ومع إن الـ 3D Printer هيأثر بشكل سلبى على مصانع كتير, لكنه هيفيد جدا المستهلك الغلبان وهيعمل طفرة عظيمة في مجالات كتيــــر.

* ده فيديو فيه نوع جديد من الطباعة ده ما كانش ظهر وقت كتابة الكلام ده من 4 سنين تقريباً
https://www.youtube.com/watch?v=VTJq9Z5g4Jk


عمر الشريف

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger