إزاى تختار العدة

7.4.15


"عدة" هو مسطلح استقر الشعب المصرى على أن يطلقه –أو يشوه به- ما يسمى بالمحمول : )
ومن كام يوم طلبت منى أختى أختار معاها موبايل, ظاهريا الموضوع سهل هننزل أى محل ونشترى موبايل, لكن اكتشفت انه فى الحقيقة مش بالبساطة ده..
وسؤال منطقى نط فى نافوخى هو بسيط ومع ذلك بيفوت على كتير مننا: انت بتشترى موبايل ليه؟ والرد غالبا بيكون عايز أجيب موبايل جديد وخلاص, أو عشان التانى باظ : ) 
والنتيجة ان ناس كتير مش بتبقى مرتاحة للتليفون اللى اشتروه أو بيزهقوا منه بعد فترة قليلة.

حاولت أجمع ايه الحاجات المهمة اللى على أساسها بتختار تليفونك:

1-    Operating system- نظام التشغيل:
بيفرق كتير جدا من حيث سهولة التعامل معاه, وكمان فى تطبيقاته, وسهولة اتصال التليفون بالنت و الكمبيوتر.
وأشهر أنواعه

1- أندرويد:
وده منتشر جدا دلوقتى لأنه سهل فى التعامل معاه, وبيعتمد على تطبيقات كتيـــــر جدا مفتوحة open source applications و كتير منها ببلاش.

2- IOS:
وده نظام التشغيل المستخدم فى الـiphone باختلاف اصداراته, ولحد دلوقتى هو اللى فى المقدمة دلوقتى وعلى أساسه بتقيم باقى الأنظمة. لكن عيبه فى التطبيقات مش كتير زى الأندرويد, و كتير منها بفلوس وكمان الموسيقى والكتب والفيديوهات, مش سهل انك تنزلهم زى باقى الأجهزة.
 وطبعا تحط فى اعتبارك سعر الـiphone  نفسه : )

3- Research in motion
ده نظام التشغيل المستخدم حاليا فى الـBlack berry, بسيط, ولكنه مش قوى, و التليفون ده بيعتمد فى الأساس على سهولة الكتابة فيه فبيسهل التواصل مع أصحابك من خلال BBM أو باقى تطبيقات التواصل الاجتماعى.

4- Windows phone
ده الجديد جدا, ومختلف تماما عن windows mobile اللى كان موجود قبل كده فى السوق, ومايكروسوفت قامت بعمله من البداية عشان يضمنوا جودته. الميزة الجميلة فيه, انه على عكس كل الأنظمة الموجودة, بيبقى له شكل مختلف تقدر تغيره على حسب شخصيتك, يعنى الألوان, التطبيقات اللى بتظهر بره, التقسيمات اللى فيه, وممكن تعمل مجموعات مغلقة بينك وبين أهلك أو اصحابك القريببين منك مثلا وماحدش يقدر يتابعها غيركو. ده غير انه تلقائيا بينقل صورك وملفاتك على موقع Skydrive فتقدر بكل سهولة انك تاخدهم من أى مكان, كل اللى محتاجة انك تشترك مجانا فى الموقع ده, وتحمل ملفاتك على أى جهاز تانى.
و طبعا برامج ميكروسوفت word, excel, powerpoint, one note
ومميز عن أندرويد ان التطبيقات اللى فيه مضمونه يعنى مافيهاش فيروسات مثلا.


2-    Processor
يفضل يكون Dual core لأن عمره بيكون أطول من الفردى
وعلى قد ماتقدرر اتأكد انه هيكون سريع معاك, لأنه بيفرق جدا خاصة لو كان touch, ولو هتستخدم تطبيقات كتير.


3-    امكانيات الجهاز:
التقفيل: لازم تتأكد انه مش سهل انه يتكسر أو يبوظ
عايزه touch  وللا عايزه بـ keyboard؟
الكتابة فيه سهلة 
الشاشة تكون بدقة كويسة ماتقلش عن (800*480) pixels
وحجم الشاشة يكون مناسب ليك
الصوت والكاميرا مناسبين
عمر البطارية هتفضل معاك قد ايه لحد ماتتشحن تانى؟
مساحة التخزين مناسبة وللا لأ ؟ هل ممكن تزيد؟

طبعا السؤال الأهم, هو انت هتستخدمه فى ايه؟
لو انت عايز تليفون كويس بس بتحب تصور كتير, فهتركز على تليفون تكون الكاميرا فيه كويسة
لو عايز تليفون وتسمع عليه موسيقى فهتركز على انه يكون الصوت فيه نقى
لو عايز تليفون عشان بتحب تبعت رسايل كتير لأصحابك و بتحب فيس بوك وتويتر, فهتختار تليفون بكيبورد مريحة.
و لو بتدخل على النت كتير وعايز شغلك أول بأول يكون عليه فهتحتاج نظام تشغيل قوى, و تطبيقات على التليفون, و هتحتاج انه يكون فيه wifi وتعرف شركات المحمول نظام اشتراكات النت فيها ايه؟
لو بتتحرك كتير هتحتاج يكون بيستحمل الصدمات.
أو محتاج شكله يكون جميل, وألوانه مناسبة.

اختار الميزة اللى هتحتاجها وعلى أساس الفلوس اللى معاك, اتأكد انها أكتر حاجة موجودة فيه, وماتكسلش تدور كتير قبل ماتاخد قرار عشان تتأكد انك استغليت فلوسك فى حاجة فعلا هتفيدك.
وملحوظة مهمة وأخيرة, فى الأغلب مهما جبت تليفون هتلاقى الأحسن منه, لأن التطوير فيه سريع جدا, فارضي باللى فى ايدك يا ابن آدم عشان ماتتعبش كتير : )



عمر الشريف

0 التعليقات:

إرسال تعليق

 
موهندس خانة © 2013 | Plantilla diseñada por Ciudad Blogger