أمك اللى جايبهالك .. الجزء الثالث

أمك اللى جايبهالك .. الجزء الثالث

2.7.14

حظ المبتدئين

   ربنا أكرمك خلاص, وهتبدأ فى نقاش حاد بينك وبيــــن نفسك طبعاً –أكيد مش الحاج عشان ماياخدش منك 
المفتاح- إنك لازم تاخد العربية لوحدك وتروح بها أى مشوار وخلاص .. فرحان بقى بالرخصة . وعلى ذكر الفرحة بالرخصة العبد لله فضل من 16-18 سنة بيسوق فى كل شوارع مصر, وعديت على كماين مصر كمين كمين, وأول يوم طلعت فيه الرخصة اتسحبت !

وده لسبب تافه جداً هو إن أحد الأذكياء شرح لى طريق وقال ادخل من الشارع ده .. بس كده ! عرفت فيما بعد إن الشارع (ده) كان عكس الاتجاه وصادف –سبحان الله- يكون هو مدخل قسم مصر الجديدة وسبحان الله برضه يصادف خروج بوكس من القسم فى وشى, واللى قبل ما يتكلم اديت له الرخصة, ولكنه لكرم أخلاقه عزمنى على كباية شاى فى القسم :D .. طب ممكن أستأذنك أعمل اتصال .. اتفضل .. " ألو .. رمضان السكرى .. قصدى بابا ؟ الرخصة اتسحبت يا حاج !! " لا داعى لاستكمال الحوار عشان احنا فى رمضان ..

فأنصحك إنك لما تطلع الرخصة ماتضيعش فرحتك بها وهى لسه جديدة وتتسحب منك .. اقعد فى البيت يومين تلاتة احتفل بعد كده خليها تتسحب .

    بس نظرياً انت خلصت من مرحلة التركيز فى سواقة العربية كوحدة مستقلة, وبدأت فى مرحلة سواقة العربية كجزىء يا إما داخل مزيج لزج  وهو الشارع الزحمة , وأحياناً مش زحمة قوى, ونادراً فى الشارع الفاضى. وبدأت تتعرف على الطرق كاتجاهات وكحالات من مطبات طبيعة فى أغلب الأحوال نتيجة التاريخ الجيولوجى للأسفلت المصرى اللى بينهار فور صبه, لأنه كده كده هيبوظ ! وبدأت تتعرف على اللى بيسوقوا حوليك اللى هما بحكم الموقف هيبقوا جيرانك فى الزحمة .

    بما إنك مبتدىء لسه وعودك أخضر أنصحك لوجه الله .. ماتثقش فى اللى سايقين حوليك :

- يعنى شايف انت الصندوق الحديد اللى ليه أربع عجلات ده, وبيمشى مأموص, وتلاقيه مايل باتجاه وماشى فى اتجاه تانى, ده اسمه ميكروباص, وشايف اللى سايقه ؟ ده Serial Killer, ماتحاولش تاخد حقك منه لو ضايقك, إنما لو حاولت فـالجراة حلوة مفيش كلام, بس أخد الحق صنعة آهيما, ياما راح زيك كتيـــــر.. ومش هتلاقى ساعتها حد يكبس لك العربية بن لو اتعورت .

- وشايف العربية  اللى بتكسر عليك وبعد كده تدى إشارة, واللى وقفت فجأة فى وشك, , وبتقف بستر ربنا قبل ما تلبس فى اللى قدامها, وممكن تلبس انت فى ظهر العربية غصب عنك, وتبقى انت الغلطان, ده ست اللى سايقاها, أول ماتشوفها إهرب يا ياسين إهرب !

- شايف الواد اللى قد عيالك اللى بيلعب بالموتسيكل .. طب شايف المسدس اللى جانبك ؟

- شايف التاكسى ده, راقبه كويس عشان بيسوق بحالات, ساعات تلاقيه رايق ماشى براحته فى نص الطريق بيسمع أغانى وردة, وساعات تلاقيه راكب فيرارى,وكلها مسألة وقت وهيغدر بك عشان اكل العيش ويقف فى نص الطريق.

- لو مش شايف حاجة خالص, فانت ماشى جانب التريللا, اللى راكبها بيعرف يسوق كويس .. بس لما بيكون صاحي, إدعى عليه فى سرك. أو ممكن يكون أوتوبيس وده عامل زى الجاروف بيشيل اللى قدامه .

- لو شايف عربية من غير سواق, ده غالباً راجل كبير فى السن ونازل تحت خالص .. إدعي له ربنا يدي له الصحة :)

شايف الحمار اللى جانبك ده وشادد كارو وراه, ماعندوش حاجة يخسرها, توسع له زى زى البقرة اللى عند الهندوس .

نصيحة أخيرة, لو شوفت عربية إسعاف وسع لها بسرعة, وابعد عنها بسرعة !